بتنفسك نسمة …

كلمات الشاعر …
الناصر صلاح الدين
…
شيفانى من بين الظروف .
بخطف ثوانى نظرتى ..
واتنفسك نسمة هوا
تحيي الضلوع .
بصبر واجوع .. واستنظرك
ك البدر لما يكتمل
بتأملك .. ضى القمر ..
وشمس طالع صبحها
بيدفى أوراق الشجر
عارفانى لما بخاف قوى
وقت أما احس بغربتى ..
ف لحظة لقا
تشبه خطى فى المستحيل
عارفانى لما بنكسر
من بين عيدان ماليه الخلا
بالزحمة والخوف والقلق ..
احساس غريب ..
صوتى فى صمتى مختفى ..
لمعة عينيا بحسها دمعه وجع
وغصب عنى تنطفى
زى السطور متكتفه فوق الورق
انا بنتفض وازعل واغير
وكأنى طير هدو التعب
واقف أسير ..
نفسى اشتكيلك وحدتى ..
احط حمل المغترب ٠
و انسى الشجن ..
أنعس على كفوفك زمن
واحلم كتير ..
زى الطيور عايشه البراح
وِسع السما
واحس قلبك ضمنى ..
سمعنى مواله طرب ..
عارفانى مجذوب الهوى ..
عشقك على نخلى استوى ..
صدرك ضلوعه تلمنى
يا مركبى وسط الحاجات المبهمه
بفرد شراعى وارسمك كل المدن
بالخطوه ماشى سكتك م المبتدا
ومصورك بدر الوطن
محرابى لما بقصدك
عشقك صلا وفجر وندا
قلبك حنان المكحله
فى لمس الرموش
يا قلب متزين هنا يملا الوشوش
اشمعنه انا برا الحدود الممكنه
مع إن روحى مؤمنه
بستنشقك فرح وهنا .
بتشوقك صبر الجميل
الليل فى بعدك ١٠٠ سنه
وأفضل مسافر بين عنيكى رحلتى
مشوار طويل
وسط الحرس والعساسين
ونظرة عيون الكدابين والحاسدين
معرفش مين فينا اللى تاه
انا اللى خايف م الزمن ولا انتى خايفه م الحياه
مع إن عشقك فوق كتافى ك الضنا
ملفوف بقلبى بين ضلوعى الناعمه
زهرة حياتى والأمانى والمنى
يافرحتى بين الليالى الحالمه
عايشك امل .. نهر العسل ..
الواحه خضرا بس متحاصره ب جبل
عارفانى من دمع السفر .
وانا بترعش .
عصفور على كتافه المطر .
لكن بعانى من العطش .

كلمات الشاعر
الناصر صلاح الدين