انا اسف

كلمات الشاعرة
رضا عبد المطلب

انا اسف كمان وكمان
ع الحب اللي كان دخان
كنت بريئ وانت السجان
ليه قلبك مكنش صريح

جالك قلبي لحد العش
ولقاك ابرة في كومة قش
ملقاش عندك الا الغش
ورجعلي ذليل وجريح

ليه قلبك كترت اعذاره
قول مين جاله أو مين زاره
ولعب في حباله واوتاره
ولا انت اديتله التصريح

بعت العشرة لمين وبكام
وبتعزف علي كل مقام
ووعود لكن في الاحلام
ودموعك دموع تماسيح

كنت بجد بارع ف الدور
كنت المجرم والمأمور
وبانيت لي من الرمل قصور
صدقتك والله صحيح

لو عمري عليك مرهون
دي كرامتي عمرها ماتهون
راح اعيش لكن ف المضمون
مش هفضل في مهب الريح

قلبي كان بيتك وعامر
وانت النهاهي وانت الامر
مهما اعملك ولاهوش طامر
شوفلك حد بدالي مريح

يابو القلب حجر صوان
عمري ما هرضى لنفسي هوان
هرمي حمولي علي الديان
وادعي وازود في التسبيح

كنت في دمي ولا الوسواس
عمال تقتل ف الاحساس
قلبي خاف من كل الناس
وملازم فراشة طريح