اذان الفجر

كلمات الشاعر
عبدالرازق الشريف

اذان الفجر
ناداني
وصلاني
مسح بنسيمه احزاني
بمد ايديا فضلوعي
لقيتك جوا ساكناني
…
آمنت بعينك ” الساحره ”
وداخل في الصلاه بخشوع
كأني الاعمي يا صبيه
ووحدك كنتي ليا يسوع
..
مسحتي بكفك ” الضلمه ”
وجبتيلي القمر والضي
مشوفتك زي قلبك زي

كأني القلب كان عطشان
فعين صحرا
وشاف في ايدكي
نبع المي
..
غريب ملهوش سواء الاشعار
وقلبة فيه ٢٠٠ منشار
وجرح غويط
وجاي للغربه ولا عنده سكن
ولا بيت

سماره تشوفي فيه الشمس
دون متغيب

عيونه فيها الف حبيب
مفارقينه
وحوالينه
صحاب ياما
لكن ناقصه وجود محمود
واحمد برضو واسامه
فمهما الدنيا تديله من الاصحاب
” هتلقي فعينه شخص غريب ”
..
غريبه يا ورد بتحني ؟
لواحد ضيع ” الفرحه ”
علي واحده محبتهوش

لكنه كان لروحها جيوش
بيحميها من الأيام

تولع كل ليله الحرب في ضلوعه
وهو بيشترليها سلام

قليب الشهم لو واخد ٢٠٠ طعنه
مهيخفش سنين قدام 💔
..
فكيف يام الكفوف خضرا
تقولي لقلبي انا
اهلك
وانا ناسك
وانا قلمك وكراسك
وعوضك ع اللي مشيوا سابوك

وكيف شوفتيني حد جميل
وانا فعيني بيجري النيل
وصوتي الناي يهد الحيل

وكيف اقنعتي قلب الورد
يخرج من عيون الشوك
…
فسبحان اللي خلي فعينك الالماس
” وطن وبيوت وعزوة وناس ”
يا جايبه البحر جنب النيل
عنيكي دليل
وانا والله مش شاعر
دا حرف الشعر لو شافك دموعه تسيل
..
دا لو قابل عنيكي نزار
لكان يحتار
ولا يكتبش غير ليكي

ولو سمعك بليغ حمدي
لشافك لحن معرفهوش
وجاب فيروز تغنيكي

وبيكاسوا
اذا صابه هوا رموشك
لضيع عمره بالريشه
وهو بيوصف الجنه
ولا يوصلش لعنيكي
…
وده حظي
ودا رزقي
ودي بيتي وسكون الروح
يا دعوة دعيتها وانا ببكي
فقابلت باب كريم مفتوح

مكنتش نوح
ولا يونس
ولا قلبي
” بطهر السيدة العذراء ”
لكن ربك رضي عنه
” ومن فيض العطاء اداه ”
يا نور الشمس في العتمه يا عوض الله ❤️