مسكون بعطرك أنا للشاعر المصرى شعبان شلبى

مسكون بعطرك أنا للشاعر المصرى شعبان شلبى

كلمات الشاعر المصرى شعبان شلبى

……………
بانطق
حروف إسمك وباتهجى
وكأنك غنوة فوق لسان القلب
طالعة بميت لهجة
باب الزمن قفلوه
وانتي بحنانك تقولي
يا ملايكة اسقوه

كبرت خُطاي
فوق سنين الدرب
من غير إيدينك يا أمي
سهل الحياه بقى صعب
مسكون بصوتك أنا
وتملي بدعيلك
بحق ما عرفتي الشقا
ورضيت بقليلك
وبرغم طمي الحياة
بترويني بصفا نيلك
رغم الضباب في الطريق
بتمدي قنديلك

أمي اللي صبرت
وياما عاندها الزمان
كان حلمها
أكبر لها قبل الأوان
وتشوفني فارس
واخد عروستي ع الحصان

بتضيق حياتي
اللي كانت
جوة أحضانك براح
بيعود مساي
قبل ما يهل الصباح
أصبحت ..
لا حضن ولا ضمه
أتفرقت كل الحبايب
والقعدة واللمة

دلوقت ..
شفت البشر
من غير وشوش
يوجعني منهم
ضحكة صفره
تستخبى في الرتوش

حافي انا ع الشوك
وشوقي عريان البدن
مصلوب على برد الأغاني
باتغطى بلحاف الزمن
خلصت ألف عتاب
وكتبت غنيوة
قلبي الشباب اهو شاب
من شوقه يا حليوة

جاني ف صلاة الفجر
طيفك يصحيني
ولقيتني رافع إيديا
منقوشه بالحنه
أدعو أقول الله
في الفرض والسنة
أمي التقية يارب
اكتب لها الجنة

شعبان شلبي