جرحك سكن ف الروح …

كلمات الشاعر …نسيم الزراع

القلب فاتح دنيته للغير
والحضن عاشق للدفا تغيير
وأنا كنت فاكر إن انا لو طير
هقدر أرفرف فيكي وامشي واطير
لكن ياحلم هزيل مالوش ف يوم تفسير
قلبي حسبته شهيد وتركته فيكي أسير
…..
ياغنوه قلبي كان بيعشقها
ولحن كان عزفه بيطربني
فاتت ليالي بتكوي أشواقها
وجرحك ف قلب القلب عذبني
إزاي عهودك فيا أحفظها
وانتي تخوني وتقدري تخبي
….
سكي البيبان قلبي صبح مجروح
واوعك يبان جرحك سكن ف الروح
هدي الحيطان من فوق جدار البوح
الغدر بان والريحه منه تفوح
والجرح راح يندمل
…. لو ميت صباح مفتوح
….
لو كان خيار القلب إنه يموت
هاخنق بإيدي نبضته وارميه
واعلمه إن الحياه هتفوت
والحب لو كان ألم
…. ترياق أمل يشفيه
وان مات دخيل جواه ف يوم ما يموت
بكره هييجي اليوم والصدق يسكن فيه
….