كرباج ورا …

كلمات الشاعر … نسيم الزراع

غمي العيون
لجل الظنون تفتح بيبان
والخير يبان
والفجر واقف ديدبان
لما اتخنق صوت الأدان
والذكر نام جوا العيون
مخنوق ومايج ف الدموع
والبحر هايج . .هبتين
…… ..طفوا الشموع
ووصلنا آخر مرحله
ولا عادش شيئ م السيطره
كرباج ورا
…. ..كرباج لئيم
ف إيدين رخام
وعيون بتبعت حلمها
جوزين حمام
متولفين لكن لفين
هيكون طريقنا ف الزحام
كرباج لضوء مات ف الظلام
مربوط ف طوق وبميت لجام
وقت الصلا نام الإمام
ولا فيش سجود هز السما
ودموع ملايكه محبوسين
كلمة آمين متأزمه
لقلوب لازمها أسطره
كرباج ورا
……. كرباج عقيم
بالغدر باح دم الرياح
بينز من جفن الصباح
يملا أناني الكون خجل
إشرب مباح
إنك تسافر للمدي
من غير متقطع تذكره
كرباج ورا
وان كان أجل
مكتوب علي كف القدر
أو محتمل يحصل أكيد
قلب الحياه نبض المطر
لازم نعيد
ف قانون وجودنا المختصر
وجهة نظر
وطوفان عنيد
دايما بيتحدي البشر
يهدم سدود
والدود بينهش ف العيدان
يهدم حيطان القنطره
كرباج ورا
كربااااااج ورا
……