… رهان خسران …

كلمات الشاعرة … هيام حمزة

رهان خسران ..
راهنت عليك ..
وبرهاني جفاني النوم
عشان مش عاوزه يوم أخسر
رهاني عليك
راهنت عليك بقلب صافي متردد
وكان … لهواك بيتودد
و يتمني يزيح الحزن من قلبك ونن عنيك
راهنت عليك…
وماخطرشي علي بالي
اني ممكن اهون
او اخسر روحي برهاني وحبي ليك
راهنت عليك
وع الايام وع الاحلام
و دنيا رسمت ملامحها…
وقلت ح انام وانا في حضنك
وكلي امان ..
راهنت عليك
بكل العُمر والدنيا
ومافكرت ولا ثانيه
ف مرة تخون..!!!
قالوا لي الناس كتير عنك
مالكش حبيب
وطبع الغدر فيك غالب
تجارة الحب ليك غيه
واني بنتهك روحي بغرامي ليك
ورغم ده كله والله
راهنت عليك .. !!
راهنت عليك
بإحساس صافي وبنيه
وحبي اللي أتخلق فيا
وقلبي و نبضه حنيه
راهنت عليك
بكل الحب والغيرة
بكل كلامي والسيرة
وكل حروف هوايا فيك
راهنت عليك
برغم ملامحك الدافية ورقه قلبك الصافية…
ده كان ظني حقيقي فيك !!
وخاب الظن …ورهاني طلع خسران
وكان خذلاني … منك سيف
دبح روحي …
ومقصلتي في نن عنيك …!!
راهنت عليك
كما الولهان
كما السكران
كما القلب اللي متعلق بروح أنسان
كما ريشة …
كما قشة بتعافر
في وش الريح…
بقلب جريح
و مش ممكن تنجي
القشه يوم غرقاان ..!!!!