شَمس الإعدام …

كلمات الشاعرة … منى عبد الرحمن

هِناك بالِّليل
وانا فَارشَة الحُب
ف قَلب النِّجمَة امُّ المَواويل
وبَالِم سَحاب السَّما
وأغَطِّي الرُّوح الدَايبة سُهاد وعَوِيل
وبَشاوِر لِلْقَمَر الِّلي بعِيد
وبَحَنِّن قَلبُه مايِتأخَّرش
ماعرَفش.. ازَّاي..
كُنت بَوَشوِش قَلبُه الحَيران
واحدِفلُه أمان
واهمِس ل بُساط الرِّيح علشان.. مَايرُوحلُه أوام
برسَايل من نِن عيُوني
مَاليانة بحُب وشُوق وغَرام
وانا والأيام
نِستنَّىٰ القَلب التَّايِه لمَّا يعُود
وكأنِّي العُود
وبتِعزِف علىٰ وَجَعي الأوْهَام
بَتمنَّيٰ الحِلم بحِلم جديد
كل المَواعيد مُش عاوزة تنام
والحِلم بيطلَع برضُه فاشُوش
وبسرعة يبُوش
لمَّا بتِطلَع شَمس الإعدام
وبتقضي علىٰ الحِلم النَّايِم
فِ جبين الرُّوح