أعتذر وابوس الإيد …

كلمات الشاعرة
عزة أحمدابوزيد ابوزيد

أعتذر وابوس الإيد
واطبطب روحي مش خايفة
واجمّّع شوقي جوا حروف
وقلبي يشوف
ورود لحبيب وحبيبته
زرعت الود ورعيته
هوايا كان له نور ساري
بيعشق كل تفاصيله
انا ليله
ويكبر وردي في البستان
واجمّل صورتك الباهتة
وازوقها رتوش ألوان
عيوني تايهة مش شايفة
حروفي رقصة بالقافية
على كل السطور دايخة
وإيه تاني أقوله كمان
أتاري قصتك بايخة
عشقت الضلمة
وباشوفها
سبايك نور
عشقت الجرح
وانا ويّاه
ما انا قلبي اللي كان مجبور
وتهت ف دنيته الواسعة
حياة لاسعة
بكلمة .. تحلا أيامي
ما انا المظلوم
وانا الجاني
ماكنتش شايفة أوهامي
وجي تعتب وبتحاسب
وفارد لي جوزين كرابيج
ما انا اللي
جيت علي نفسي
ودوست عليها بالمراكيب
أنا استاهل وغلطانة
ولازم إني أتأسف
والوم نفسي
واعاتبها
واربيها
وأدبها
عشان تعشق خاين كداب
ولساها
تقول دا حبيب