إوعي ف يوم تفتكر…

كلمات الشاعر …نسيم الزراع

إوعي ف يوم تفتكر
إنك قوي وجسور
جناحك اللي اتكسر
أصلا جناح عصفور
أضعف من الريح القوي
مهما ف يوم يرفعك
هيرجعك مكسور
خلاص قطعت النفس
إفتح بيبان القفص
واقفل عليك السور
*************

لسه الأغاني ممكنه

غصن الهوي الممزوج بأحلامك
برعم دفا بتحضنه الأصداف
مين ف الغرام رغم الضنا لامك
قلبي الغريق مركب بلا مجداف
لسه الغناوي بتخطفك مني
وانتي اللي ف النني
برد وغطا ولحاف
****
لحظة مخاض الروح ودمعتي الساكته
تحبل ملامح ضحكتي الباهته
من بين خمايل عشقك الطارح علي جبيني
ودوبان الهوي الموشوم علي ثغرك
سكة لقا بتحضن الأفراح
والخطوه فوق المدي أحلام بتتخضر
وتعصر ملامح ضحكتك
علي صدرك المرمر
*****
يابسمة النوار وطرح النور في أحضاني
يامكمن الأسرار ودوبان الهوي الجاني
لساني بحضن ملامح سكه سكناني
وضحكه تهز الضلوع
وقت إختمار الحلم ف الوجدان
حين يكتمل قمر المسا بين ضلفتين عينك
ويرتعش شهد البراءه ف الشفايف
قلبي اللي خايف يلمسك وقت الحصاد
بيراود الزهر اللي طالل بين نهودك
يغزل التراحيل علي شط الهوي العذري
ويميل الدفه علي شراع اللقا المزعوم
***
فكي إيديكي من غيوم فجري
وافتحي باب النهار
أنهار بتبعت ريقها للعصافير
ودواير الصمت اللي هالل
يفرد مداه علي جبنيك
طارحه الأغاني بين صدف صوتك
وملمس الحنه علي خدودك
****
يامخضره الفرحه وحاضنه الحلم جواكي
قلبي اللي رشرش شهقته إسمك
من بين بريق همسك لساه بيهواكي
لساه بيغزل للندا نبضه
ويواعد البدر اللي طالل من عنيكي ضياه
شقيني من ليل الدفا لحظة صفا فيكي
واحضنيني باشتياق
قلبي اللي عازم ع اللقا والغربه ف عنيكي
أنهكه طول السباق
طراطيف صوابعي بتلمس السكه
وبتحضنك أنهار
وتدوب علي رمشك ضحكتي النوار
يامكمن العمر اللي باقي واختصار الأزمنه
لسه الأغاني ممكنه
لو عاند المشوار
……….