قبل صباح الخير

كلمات الشاعرة … عفاف أحمد التركى

مششش هاقبل منكم الفاتحة علي روحي
وانا اللي عشت باتمني
..ألاقي فـ حضنكم ..دنيا
……………………….. ………..

احنا فـ طوابير..هنموت بالدور ..
فما حدش يخبط كتف اخوه ..
ولا ينهش فيه ويجيب سيرته
ولا يرمي بلاه..ويعمل قدّيس
كللللنا هنموت .. والموت فوانيس
صدّت جايز .. وما بتنورش
مطفيّه صحيح ما بتتغيرش
بتنوّر وقت ما حد يغيب
وقتها بنبان ضعف وجبروت
نتحاشي الموت علشان هنموت
بنطبطب علي كتف الغاليين
علشان عارفين الموت سرّاق
قطر وماشي من غير سوّاق
بينزّل ويطلّع ركاّاب
وبنمضي حضور وبنمضي غياب
وقطعنا ذهاب من غير عوَده
رايحين لبلاد ..كل الاحباب
.. رايحين للونسة وللصُحبة
والغنا ..والدمع في حكاويهم
رايحين ..رايحين ..
مين يسبق هيوصّل ليهم
ويبلّغ حالنا واحوالنا
وصبحنا ازاي اوراق اشجار
(مين جاي مساها ؟؟؟..)
مين اختار ..
يا وجع القلب لو ناخد عزانا فـ بعض
لو فهموا اللي غاويين فُرقة ومشقّة
دا اخرة ..اوّل المشوار
ماكانوش هيخلقوا الاعذار
ولا يباركوا الغياب والهجر
ما هو الموت اذا بنحتار
بيعلن دولته فينا..
ويفتكرونا لو يعني ..
في روحهم مرة عدّينا
قسمنا الضحكة زي رغيف
نكرنا الكذب والتحريف
او زل اللسان ..مرّة
فـ بانت قصة من برا ..
بإنك وحدك السئ ..
وهمّا لوحدهم اطهار
نسيوا الموت مالوش انذار
يزق الباب وياخد مننا روحنا
ودوّقنا وقال انا اهو ..
وورّانا عينيه الحمرا..
وقطّف زهر كام غالي
قُصادنا وفات..
سنة فاتت ..ويوم عدي
وكل ما تقصر المُدة ..
بنبقي ساعات ..
مجرداسم في الخانة
ويتسابقوا يزفّوا الدمع بالرحمات
وبكرة هينسوا ويعيشوا
وتبقي الرحمة اللي نبعتها
زيارة وجاية للاموات
فـ مستاهلة ؟؟؟
ايدين الحزن تبقي وداع
او مستاهلة ..
تموت زعلان ومتضايق؟؟
وهو القبر هيطيقك ..
ويستوعب كلام فارغ؟
مِد ايديك لأصحابك
وصفّي القلب و النيّة ..
ياعاالم مين عليه الدور
ما دايم إلا قلب ابيض ..
فـ هات ايدك نعدّي السور
ونتونس فـ احضان بعض
دلوقتي اناوانتوا سوا عايشين
وبعد شوية هنتقابل
في طول او عرض
يا متخاصم ..
وسنّيت الفراق سُنة..
قصاد الموت ..
لُقانا في قريب عاجل ..
هيصبح ( فرض).
………… ……………