بهتانه ألوانى …

كلمات الشاعرة ريم صلاح

يا فرحه خاصمتني
وسابتني من مُدّه
واهو كام نهار عدّى
والضحكه نسياني
كان الميعاد بنّا
تاخديني للجنّه
هرب الميعاد منّا
ومافيش ميعاد تاني
فصل الربيع طارح
شجر الخريف فيّا
والدمع ف عينيّا
من كتر أحزاني
سلّمت مفتاحي
للحب لوّعني
ونهار ما باع باعلي
دنيا معانداني
أمسح دموع العين
من عيني بإيديّا
تحدف دموع تانيه
وتجيب وجع تاني
أمسك ف ديل النوم
يهرب ويحدفني
على حزن يكسرني
على هم صحّاني
أسرح مع الأحلام
واملا السما فوانيس
أصحا على الكوابيس
م الحلم رمياني
يا حزن بكفايه
بحرك مغرّقني
لو كنت تسمعنى
رح تبكي علشاني
محتاجه لون أبيض
يظهرلي م االعتمه
د انا من زمان شايفه
بهتانه ألواني
صحرا الحياه واللا
دمع العيون خلا
االتوهه تبقالي
ف الدنيا عنواني
………………..