الجمل مبروك
كتب اشرف كمال. اللي في الصورة ده هيكل اشهر جمل في مصر و هو الجمل مبروك
مين بقي مبروك.. مبروك ده اخر جمل حمل كسوة الكعبة من القاهرة الي مكة المكرمة في رحلة ” المحمل الشريف ”
واللي ميعرفش القصة تعالى احكيهالك
مصر من ايام المماليك كانت بتصنع و ترسل كسوة الكعبة كل سنة لمكة المكرمة و الكسوة دي كانت بتطلع علي جمل و بتطلع في موكب كبير و كانت بتلف الاول القاهرة و المصريين يرموا عليها الورد و يوزعوا الحلوي و يعملولها زفة كبيرة و هما فرحانين بيها
طبعا مش اي جمل كان ينفع للمهمة دي خاصة ان المسافة طويلة بين القاهرة و مكة و كان لازم يكون الجمل ده قوي بما فيه الكفاية و كانوا بيختاروه بعناية و بيوكلوا المهمة دي لوزارة الزراعه اللي كانت بتكلف متخصصين للبحث عن اقوي جمل في مصر كلها و كان بيتم تدريبه لفترة طويلة و يعينوا له اطباء مخصوص عشان يراعوه
مبروك بقي كان اخر جمل حمل كسوة الكعبة و اشترته الحكومة من مواطن في اسيوط ب ١٢٠ جنيه و ده كان مبلغ كبير وقتها و كان معاه جمل تاني اسمه نبيل برضه كان بيتولي نفس المهمة و علي فكرة الجمل اللي كان بيحمل المحمل الشريف كان ممنوع يتم ذ..بحه و اكله و ده من ايام المماليك كمان
اخر محمل للكسوة خرج من مصر كان في عهد الرئيس جمال عبد الناصر و موصلش للحجاز لانه رجع قبل ما يوصل بسبب خلافات سياسية حصلت وقتها بين مصر و المملكة السعودية و بدأت من وقتها السعودية تصنع هي الكسوة في منطقة اسمها أم الجود و بعدين نقلت مكان صناعتها لمنطقة اجياد
هيكل الجمل ( مبروك ) موجود حاليا في متحف الصيد بقصر الأمير محمد علي في منطقة المنيل
Discussion about this post