لقيت الطبطبه ،،،،

بقلم …. نورا عواجه

عاوزه أحكيلكم حكايه يمكن تبان عاديه بالنسبالكم أو تافه بالنسبه لبعضكم ..
بس ياريت تقدروا مشاعرى وتسمعوا الحكايه للآخر ..
كالعاده وبما أنى شخص متعب لكل ال حواليا إخواتى كانوا بعتين شويه طلبات من الأقصر لأسوان علشانى ، وفى الغالب أن أخوى الغالى أبو أحمد بيبعتها من موقف السيارات . وبعد ما بعتها كلمنى فون بيفهمنى على التفاصيل وقفلنا المكالمه . لقيته بيرن تانى ويقولى ،( فى صورة فى الكرتونه رسمهالك مصطفي
مخصوص علشانك وصمم أننا نبعتهالك مع الحاجه )
قسماً بالله الكلمه لوحدها قسمت قلبي نصين من الفرحه ، ومش عارفه أستوعب ال سمعته إبن أخوى ال عنده 10 سنيين فى خامسه إبتدائي ،
وأنا فى محافظة وهو فى محافظه تانيه ، ووسط المدرسه والدروس الخصوصية واللعب والشقاوة أفتكر عمته ال بيشوفها كل فين وفين ورسم علشانها مخصوص ، ومضي بإسمه تحت الرسمه دى
(من مصطفي إلى العمه نورا وعمل قلوب ♥️♥️♥️) قلب العمه ياحبيبى ،،، اجمل رساله حب وصلتنا فى حياتى والله ،

عادى أن الطفل يرسم أمه وأبوه وأخواته ومدرسته والبحر والشمس والشجر ..
بس مش عادى أنه يرسم عمته ويحطلها قلوب ♥️
عارفين رسايل ربنا ال بيطبطب بيها علينا ..
رسمة مصطفي إنهارده ليا
من أجمل الرسايل دى . ولقيت بيها الطبطبه حرفياً ،
لأن الرسمه دى وراها قلب حنين جداً ، وعاطفه ممزوجه ببراءة الأطفال ال بتختفي أحياناً وسط الشقاوه الزياده المعروفه عن مصطفي ، ووراها ذاكره فاكر بيها عمته ومنسيهاش ،
اجمل مشاعر الحب والحنيه مش شرط أبدا تكون مرتبطه برجل وست .ممكن تكون من قلب حنين زى قلب مصطفي لعمته مرت على صحراء قلبي فأخضرته ..وجفاف روحى فروته .علشان كده محدش يأجل اى مشاعر حلوه جواه لأى حد
العمر بيجرى وكلنا محتاجين شوية حب وحنيه نتقوى بيها على تلك الأيام الثقال ،
انتوا متعرفوش المشاعر ده بتعمل فينا أيه

والله أنا مهما أوصف مش هقدر أعبر عن إحساسي
والشعور الجميل الدفى الحنين المفاجيء ال دخل قلبي إنهارده ، وأشهد الله أنه جاء فى وقت الله وحده أعلم بصعوبته ، وكأن يد الله تربت على كتفي ،
اللهم لك الحمد حمداً كثيراً طيباً مباركاً فيه أن جعلت لي فى قلوب أحبتى ودا ،
وجعلت لى فى قلب أبنى وأبن أخى الصغير مصطفي مكان ،
ولك الحمد على رسائلك التى تأتى فى وقتها لتجبر بها الخاطر وتٌرضي بها الروح وتطمئن بها القلب ،

وأسأل الله العظيم رب العرش العظيم أن يبقيك يامصطفى ياقلب عمتك ، أنت وأحمد وعبد الله ومحمد ويديم عليا نعمة وجودك وأنت فى أتم صحه وأحسن حال وأن يجعل لك شأن عظيم بين أهل الأرض والسماء وأن تكون فخراً لنا جميعاً مثل أبيك وعمك وأخوالك ..
وتكون ديما مصدر الحنان والحب والطبطبه لنا جميعاً
وأخيراً…
يا مصطفى يامصطفى أنا بحبك يا مصطفى ،،،❤️❤️❤️