“فرس الرهان” منى علام

“فرس الرهان” منى علام

منى علام

عندي سؤال..

هو انت تعرف أبقى مين؟!

أنا بنت قهوة..

بألف طعم،

وعشقها نيكوتين

وكلامي مظبوط مش زيادة،

وعمري سادة..

غمّقت وشي السنين

بس نظرة واحدة مني..

تظبط الدنيا ودماغها..

كإن عيني للحياة كافيين

والسؤال:

إنت تعرف أبقى مين؟!

مش كل من ف القهوة يمدح

يبقى شاعر

ولا كل من للقهوة يشرب يبقى ساهر

بس لو تشرب غرامي..

كتير هتسهر..

أصل أنا قهوة مشاعر

حتى لو بُني حزين

والسؤال:

هو انت تعرف أبقى مين؟!

أنا روح بريئة اتسرسبت..

من بين إيدين حلم اترسم..

على صفحة بايشة م الحياة

رغم الألم..

مات العشم..

لكن حبي عمره عن قلبي ما تاه.

باشبه قصيدة مات شاعرها..

وهي حية،

واللي يسمع حرف منها..

غصب عنه..

راح يقول الله

لسه جوايا الحياة

والسؤال:

هو انت تعرف أبقى مين

باشبه لألبوم الصور..

لامم كتير م الذكريات

شايفة عليه كل الكلام

اللي اترسم فوق الشفاه،

رسم المشاعر ع الحيطان

وقصيدتي ما تخسر سباق..

أصل المشاعر عندي مش حبة كلام..

لكنها فرس الرهان

كلمات الشاعرة

منى علام

☕