رفيق وسميرة أحلى حب

بقلم الأستاذ: رفيق بالرزاقة

زعمة حبي ليك يدوم
و يزيد يقوى كل يوم
يا حبي انا بيك مغروم
نبات و نفيق على حبك
و يشهد علي ربي و ربك
اش قولك يا نور عيني
نسافروا غدوة بكرهبتي
ماك تعرف فوائد السفر
يجدد حبنا طول العمر
يزودنا بالطاقة الإيجابية
و يقوي علاقتنا الغرامية
نزيد نحبك و نتعلق بيك
و انت زادة تتأكد اني شاهيك
انا ما نكون سعيد بلاشي بيك
خليك معايا على طول الزمان
و انا نوعدك نعيشك في أمان
يا سميرة يا قلبي و روحي
ما أسعدني بيك يا حبي
سمحة و حنينة و ياسر بنينة
تعشقني كيما انا زعبان و انت زعبانة
مواتين بعضنا و متفاهمين
باش نعيشو ديما متهنين
ما احلانا و ربي يكون معانا
نعيشو عيشة هنية في الصباح و العشية
في الرياضة مع بعضنا و في السفر مع بعضنا
و في دارنا نعيشو على الحلوة و المرة
و نكملو بعضنا بالحب و المودة و الرحمة
هكة ربي يحب زواج سعيد
و عيشة باهية كل يوم تزيد
انسجام و محبة صافية على طول
نراعي بعضنا و كل واحد منا يكون مسؤول
على راحة الثاني و معاملتو بالمعقول
حياة المحبين تحفونة و بنينة
ضحك و لعب و نتعاونو في الكوجينة
احترام و قدر و شركة في كل شيئ
في البيت مرا و راجل متحابين
و في الدنيا ديما متهنين و متفقين
انت لي و أنا ليك على طول الزمان
نعيشوا في فرحة و سلم و أمان
اعتبرك صاحبتي و امي و مرتي
نفهموا بعضنا على الرمش يا حبي
انت والله روحي و قلبي يا عمري
رفيق و سميرة قصة حب كبيرة
نسقيو جردة حبنا بمياه المحبة
و نعاملوا بعضنا بالعطاء و المودة
ما اسعدك بي و ما أسعدني بيك
تخاف علي و نخاف عليك
نتوحشك و انت بحذايا
و تتوحشني و انا معاك
هكة يكون الحب بيني و بينك
يا أحلى حب في حياتي بعد الستين
و يا اجمل حب في حياتك بعد الخمسين
تجمعنا نفس الاهتمامات و الميولات
محبة كبيرة صادقة و برشا سفريات
و رياضة المشي يوم بعد يوم في الجردات
في نابل الزاهية المزيانة
و في كل قرية و مدينة
من تونس 🇹🇳 المزيانة
ما أحلى زينك و ما أحلى زيني
نسمعوا أحلى أغاني أم كلثوم
و نحضروا في أكبر المهرجانات
مسرحيات و أحلى السهريات
و ضحكات و فازات و أفاريات
و عيشة هنية متاع البايات
استاذ و أستاذة متفاهمين
على حب العلم و الثقافة و الرياضة
انا الدلو الطيب و عاشق الحياة
و انت الجدي الطيبة عاشقة أجمل حياة
استقرار و سعادة في كل الأوقات
ربي يكتب لنا الخير و البركات
الإخلاص و الثقة في المعاملات
نضمنوا أحلى عيشة كيف برشا
” كوبلوات”
هكة يا نور عيني متفاهمين
و قدام ربي و النبي متعاقدين
و ربي يرضي علينا ربي و الوالدين

نابل في :الجمعة 2022/09/09.