كل حاجه ناقصة،،،،،،، حاجة نورا عواجه
بقلم نورا عواجه
من طبيعة البشر أنهم دايما بيبحثوا عن الكمال أو الأقرب إليه لأن الكمال لله وحده سبحانه.البشر كلهم بلا إستثناء عوزين يعيشوا مرتاحين مش نقصهم حاجه عوزين مال وصحه وذرية وراحة بال . لكن فى ناس الأهم بالنسبالها أنها تعيش وقلبها مرتاح . ودى أغلى أمنيه لناس كتير . بس مع الأسف . فى ناس عاشت وهى ناقصة راحة القلب والبال ناقصه حب ومودة وحنان ناقصة إهتمام ، عاشت ناقصة ونس وإحتواء ،
ناقصة ضحكة من القلب ، ناقصة سند وإن ليها حد تحس أنه الأمان من وسط العالم ده كله ، مهما تغلط ترجع تلاقيه فاتح دراعاته مستوعب وفاهم الغلط ده كان ليه ومقصود ولا لا .
ولو مقصود ليه ولو مش مقصود منعملش كده تانى .
فيه ناس كتير عاشت ناقصة صديق يبقي مرايتها بجد مهما تقول وتحكى وتصرخ وتتجنن . الصديق ده موجود بيسمع الصغيرة قبل الكبيرة ويحتوى الوحش قبل الكويس عمره مايمشي مهما حصل من صديقه ، يوفر عليه عناء التبرير ويوم ماييجى يحكى يقوله أنا فاهمك من غير ماتتكلم ،
فيه ناس عاشت ناقصة اللمة والعزوة والأهل يا بالموت يابالفراق والغربة .
مشبعتش من حد . لا من حيطان بيتها ولا من أبوها وأمها وأخواتها ولما راحت دنيا جديده مشبعتش حتى من أولادها ال ندهتهم نداهه الدنيا..الناس دى جواهم خوف ووجع كبير ميقدروش يحكوا عنه لأى حد لأنه ملهوش علاج .
ولأنه مينفعش نطلب من الناس أنها تهتم بينا أو تسأل علينا ، مينفعش نطلب أنهم يحنوا علينا ويحسوا بينا قبل ما نتكلم .. لأنه غالباً إحنا مش بنحس بحبايبنا إلا بعد فوات الأوان . علشان كده
حوشوا حبايبكم ،
حوشوا جواكم ذكريات ليهم وأحفظوا وشوشهم كويس
حوشوا صورهم . سجلوا فيديوهات ليهم . عيشوا لحظات حلوه معاهم على قد ماتقدروا . قبل ماتصحوا من النوم متلقوش حد .
ال يقدر يتجوز جمب أهله يتجوز ومايبعدش .الغربه وحشه بجد ،
وال تقدر تقعد فى البيت ماتنزلش تشتغل تقعد علشان خاطر بيتها وأولادها.
وال يقدر يروح يزور أهله وحبايبه يروح فورا وميقصرش .المكالمات عمرها ما هتعوضنا عن حضن أخواتنا ونظرتهم لينا
والماسجاتات عمرها ماهتغنينا عن نَفسهم وحِسهم فى الدنيا ، من أصعب الحاجات إلى ممكن تعيشها أنك لما تشوف أبوك أوأخوك بعد فتره وتكتشف أن شعره شاب أو فى تجاعيد تحت عينه بفعل الزمن إل أتحرمنا من بعض فيه .
طبطبوا على بعض قبل فوات الآوان ،
وحنّوا على بعض ، الوقت مش في صالح حد ، طبطبوا قبل ما يجي الوقت اللي ما ينفعش فيه ندم ولا ينفع فيه سؤال ولا إطمئنان ، ولا مواساة . راعوا الظروف والمشاعر والتمسوا العُذر وخففّوا عن حبايبكم إختبارات الأيام والشدائد .
وأخيراً …
أحضن صحابك كل يوم 100 حضن
وشيل معاك أحضان لوقت الفراق ،
الوحدة هي الخوف وطعم الحزن ،
وعلاجها ترجع تلاقى ناس فكراك …
Discussion about this post