#الاختلاط…,,, بقلم نورا عواجه.
#بقلم_نورا_عواجه.
من أخطر المظاهر اللي طغت على حياتنا بشكل مرعب جدا هو الاختلاط زياده عن اللزوم بين الشباب والبنات
خصوصا فى المدارس والجامعات والنوادى والحياة عموما، والاخطر ان (اللمس بالايد) بقي ظاهره عاديه جدا بالنسبالهم
بيضحكوا بالايد ويهزروا بالايد، وكأنهم بكده بيثبتوا لبعض انهم قريبين وغالييين وواثقين فى بعض، لكن مع الوقت، الولد هيبص للبنت دى بصه مش كويسه ابدا (بس من غير مايقولها ) هيخرج معاها ويسهر ويتفسح، ويهزر بالايد زى ما يحب
لكن يوم ما هيحب يرتبط جديا عمره ماهيفكر فيها كزوجة لأنها بالنسباله اصبحت (ملكيه عامه) والراجل الشرقى بطبعه انانى بيحب الملكيه الخاصه بيه هو لوحده مش اى حد تانى، والشاب اللي عاش حياته بالطول والعرض وقضاها اختلاط ليل نهار، مش من السهل ابدا انه يثق فى اى بنت لانه فقد الثقه من اللي عاشه وشافه قدامه
ومع الاسف الشديد والحزن الاشد
فى ناس متخيله انه مع التقدم والتحضر عادى جدا ان البنات تخرج مع الشباب يسهروا ويتفسحوا (ويهزروا بأيديهم )
واحيانا يسافروا مع بعض بالايام والاصعب من كل ده ان الأمر وصل انهم يحضنوا بعض عادى سواء فى الشارع او فى الجامعه (قشطه )
(ياشيخ كبر دماغك وبلاش تخلف ورجعيه) وكل الناس كده ،
كده ايه بس ربنا يصلح حالكم !!!
وعادى برضوا مع التقدم والتحضر
انها تبقي (ملطشة العيله )
دا جوز خالتو زي بابا يطبطب ، وده جوز عمتو زي جدو يبوس
، وده ابن عمتك زي اخوكي يهزر بايده ، وده جوز اختك مربيكي يشيل ويحضن هو فى ايه ؟!
ربوا البنات على انهم ( برنسيسات وملكات)
وجسمها غالي وغالى جدا
شفتوا ملكه بتسلم على كل من هب ودب او حد يستجرى يبوسها
فيه جمله ل هشام الجخ بتقول “طب لو عندك حته ماس هتخليها مداس للناس” ؟!
من شب على شيء شاب عليه
القريب اللي اتعود يحط ايده او يحضن او يبوس عشان دى لسه طفلة صغيرة ، ومفيش حد فاصل، هيتعود يعمل كده فى اى وقت واى سن
وياما مشاكل عائلية واجتماعية ونفسية مسكوت عنها بتحصل بسبب التعود ده .
مهما كان تدين واحترام الاسرة لكن ربكم اعلم بكم ..
ليه اعرض بنتي لتقلبات البشر اللي في علم الغيب يا صابت يا خابت
ياما اخوات خسروا بعض بسبب ان جوزها عينة زاغت على اختها( طفلة الامس التى اصبحت شابه مراهقة)
ياما بنات تعلقوا بأبناء خال او خالة اوابناء عم وقلوبهم اتكسرت
والاهالي كانوا بيقولوا دول اخوات وبناتهم بتتعذب بسبب تساهلهم .
ياما ازواج خالات واعمام كانوا ذئاب في ثياب وعاظ وحامي الحما حراميه الا من رحم ربي طبعا..وكلامى ده مش قاعده عامه انا بذكر الجانب السيء فقط ال المفروض ناخد بالنا منه…وبالتأكيد فى ناس كتير جدا محترمه وبتخاف ربنا فى بنات الناس ؛ ليه نعرض بناتنا لاختبارات نفوس البشر هن في غنا عنها
البنت لازم تتعود ان محدش يلمسها من نعومة أظافرها غير المحارم وبس
وحتى المحارم ليهم حدود برضوا
وتعرف يعني ايه (ده رجل غريب)
من سن (4 – 3 )سنين اول ماتفهم وتوعى لازم تفهمها شويه شويه.
ومن المضحك في العائلات المصرية ان يكون في اخ واخت للبنت المخطوبة.
فالاب يخرج الاخت معاهم عشان عريس الغفلة ميتحرجش من الاخ وياخد راحته .
انشاله عنه ماارتاح يااخى…
يعني مش كفاية مخرج مع بنتك واحد مش محرم ليها لسه ،
لا دا أنت مخرج بنتين مع اجنبي شرعا
وحتى لو في البيت وحتى لو ملهاش اخوة رجاله .
وانت لو خايف على بنتك؟؟ يبقى انت اللي تقعد وتحمي بناتك الاتنين يا اما بلاها جوازة
ليه اعرض بنت صغيره بتتفتح مشاعرها وعاطفتها لهمسات ولفتات ونظرات اتنين مخطوبين لتستعر نار عاطفتها البكر
والاسوء ان يرتبط عندها اول اثارة عاطفيه لمشاعرها بخطيب اختها
لان مفيش اختلاط برجل غريب في محيطها غيره .
ارحموا بناتكم وارجعو لفطرتكم وبلاش شغل الافلام اللي تخن جلد الاباء وتخن مخ الامهات وجعل فطرتهم منكوسة
واصبحت الأفلام والمدنيه الزفت دى هى مرجعيتهم
بدل ما يكون الدين والحياء هو المرجع الأول والاخير !!
وخلينا فاكرين ان الرسول صلى الله عليه وسلم لما قال :
(استوصوا بالنساء خيرا) الوصيه دى مش للزوج فقط
لكن حماية نفسية البنت من نعومة أظافرها مسؤلية الوالدين اولا
وأخيرا من أجمل ماقيل فى أدب الاختلاط…
{ لاتطل النظر. ولا تستبح الحديث
وكف عن المزاح ، والزم الكلفه واجتنب حدوث الالفه ، وإياك والخلوه والكلام الذى له معنيان ،
وأترك مسافه كافيه ، وإلا فاحفظ نفسك ونفوس من حولك}
وقال تعالى فى كتابه الكريم
(يأايها الذين آمنوا قوا أنفسكم واهليكم نارا ، وقودها الناس والحجاره عليها ملائكة غلاظ شداد ، لا يعصون الله ما أمرهم ويفعلون مايؤمرون)
صدق الله العظيم…
والسلام
Discussion about this post