لاااااا والنبي..؟!! الشاعرة / عفاف أحمد التركى.
الشاعرة / عفاف أحمد التركى
دخلت عليّ لهفتك وطاوعت شوقي ورحت لك ..
حاضناك ملامحي وخطوتي نوتة انين
يا مشتاقين..شادين رحال العشق فين
كل العيون شايفاك في عيني وقلتها…
وتلف تسأل هو مين ؟
لااا والنبي..؟!!!
دا مافيش حنين غير ما اتولد علي كف حبي ولهفتي
ومافيش مساحة مقنعة ..تحسب بعادنا وفرحنا
ومافيش اجابة ترد عنّك عشمي فيك
ودا بينافيك لما بتوصل سكتي وتقول ..انا؟
لااا والنبي..
دا انت اكتمال طبع الجمال والحسن فيّ..
وانت اللي رغم البعد اقرب منّي ليّ
فمتتحاملش ..قلبي مش حمل الوجع
وبلاش تسابق زهوتك كونك جدع ..
وقّعت قلبي في حضرة العشق الغبي
لااا والنبي..؟!!!
كونك معاها في كادر واحد ..هزّني
وبقيت باعدّد 100سبب.. كان قصدك ايه؟
وبقيت بألملم في الكلام ..واطفيه في عضمي وابلعه
بعد اللي جاني وردّني..بقيت جابرني ارجّعه..
فـ ازاي تدوس علي جرح..وانت خايف توجعه
لااا والنبي؟؟!!
بعدك كسرني صحيح ولكن ..ربي جابر كسرتي
اما انتظام عهد الغرام ومحبّتي ..بين اصبعيه
ان شاء هيطمس ذا الهوي .. وان شاء،..حكم
بس همّا ما يفهموش.. ما اتعلموش
ان اشتعال الجمر..صعب
وانتشاء،الخمر ..صعب… وحكم روح ع القلب ..صعب
والكل عامل اجنبي؟؟؟
لااا والنبي؟!!!
اطلّع يا شاطر في الحساب.. بـ نتيجة عادلة ومنصفة
واطلع بضحكة بقششة وغمزة وقصيدة وسطر شبعان فلسفة
ارمي علي عتبة كلامك ..غنوة تحمل معنيين ..
(شوف بقينا فين يا قلبي وهي راحت فين؟)
وانا هاعرض اللي هاحس،بيه..وهافسرك علي مذهبي
لاااا والنبي؟!!
(كل الاماكن كلها مشتاقة لك.). الا المكان اللي اختصر قوله و غُناه
من امتي يعني اهل الهوي.. لادد عليهم انهم يحنوا الجباه
دانا شفت ذل ..يااااااحضرتك ..ربنا العالم .. مداه
فبلاش تبيع اللي اشتراك ..وبلاش تفارق دنيتي
خليني اكمّل اللي باقي.. بيك.. بدونك ..وبرضاك
خليك زحامي ف وحدتي..ثورة وجنابك مطلبي
ااااه والنبي.
……………………………………………………………
كلمات الشاعرة / عفاف أحمد التركى
Discussion about this post