#ع_السكين_يابطيخ.. نورا عواجه

#ع_السكين_يابطيخ.. نورا عواجه

#بقلم_نورا_عواجه

طبعا كل واحد نفسه يصحى الصبح على حاجات رومانسية كده و بتاع .. بونجور يا بيبي ، بحبك يا حب عمري” صينية على السرير فيها فطار إنتركونتيننتال “ومحدش يسألني يعنى أيه فطار انتركونتيننتال لأني سمعتها كده”.
هعرفها إزاى وأنا بفطر عيش شمسي ودُقه سمسم ملهومش حل ، أو فول مدمس عملاه بإيدي ، أو طبق مش وبصل عادى جداً “عيشوا عيشة أهلكم”..
المهم خلصنا من الأحلام ولا حد بيسمع كلام حلو ، ولا حد بيشوف حتى ايد الصينية الي عليها الكونتيننتال ده ، وبنصحى على صوت بينادي ويقول “ع السكين يا بطيخ.. حَمار وحلاوة يا بطيخ”،
4 بعشرة يا طماطم ( أيام زمان يعنى )
، مراوح قديمة . تلاجات قديمة أي خرده قديمة للبيـــع”. وغيره وغيره ..

هو ده صباح الناس الشقيانة التعبانة اللي ملهاش غير ربنا تتسند عليه ، بيصلوا الفجر ويسعوا من بدرى على لقمه العيش اللي لو كسلوا يوم مش هيلاقوها، الناس اللي بتتحايل على الرزق ومش بتغلب وبتطلع الجنيه من بوق السبع زي مابيقولوا، الناس دي جديرة بإحترامنا أكتر من مهن كتير تاه فيها الضمير .. بس إحنا مع الأسف بنتحترم المناصب قبل الناس .
فمن وجهة نظري المتواضعة إن الناس دي ، أحسن من أي قاضى بيخالف ضميره ونسي العدل ، أحسن من أي دكتور تمن الكشف عنده أهم من العيان نفسه ، أحسن من أي مهندس أرواح الناس عنده مش موضوع مدام هيقبض كويس حتى لو غش في الأساسات ، أحسن من أي محامي بيتلاعب بالقانون حتى لو هيرمي بريء في السجن ، أحسن من ناس كتير نسيوا الشرف والضمير..

ولو أصحاب البريستيج العالي تنازلوا شويه وشافوا وإتعاملوا مع بعض النماذج الإنسانية من إخواتنا دول هيحسوا بمعنويات جميلة جدًا، منها الرضا بالمقسوم ، هيشوفوا عقليات كبيره ومتفتحة ، وإن كل واحد فيهم سعيد بشغله ومش شايف فيه أي عيب ، بالعكس هو شايف أنه حر نفسه وسيد الموقف وعنده أحلام وطموحات نفسه يحققها .
وسبحان الله تلاقى الشخصيات العظيمة دي مش بتحسب لبكره حساب ، واللي في إيديها مش ليها، عندهم توكل غريب على ربنا سبحانه وتعالى بأنه طول ما في نفس يبقى له رزق ربنا هيبعتهوله، وعنده يقين إن اللي خلقه مش هينساه. بيفكرونى بالعصافير .عمرك شفت عصفور بيخزن أكل لبكره ؟!

فياريت بلاش وجع القلب والمناهدة معاهم ، وتلاقى الواحد فينا يفضل يفاصل معاهم على النص جنيه ، والجنيه وكأنه ثروة في الوقت اللي ال جنيه ده عند حبايبنا دول حاجه كبيره لأنه نفسه يرجع مجبور الخاطر للعيال وأمهم ويفرحهم ، في الوقت اللي محدش فينا يقدر ينطق ولا يجيب نفس ، لو دخل أي ماركت كبير مهما يشوف من غلو الأسعار .
ياريت نقدر أخواتنا دول شويه و ياسيدي و ياستي اعتبروا النص جنيه أو الجنيه ده وال ملهوش أى تلاتين لازمه دلوقتى صدقة بنساعد بيها أسره فقيرة . لكن عفيفة.

و ياريت نخف شراء شوية من المحلات الكبيرة لأنها بتكسب ملايين ، ونساعد حبايبنا دول ، أمهاتى وأخواتى اللي فارشين بشويه خضار صابحين شكلهم يفتح النفس أو بشويه ليمون ، أو شوية مش وجبنة، كل دول محتاجين نقف جنبهم ونساعدهم وندعيلهم كمان، ربنا يقويهم على المعايش ويصبرهم على الدنيا وبلاويها ويوسع عليهم، ويرزقهم ويرزقنا معاهم بالرزق الحلال مهما كان قليل ، ويكفينا ويكفيهم شر الحرام مهما كان كتير ،

ويارب متحرمناش أبدًا من سماع أحلى صباح من حبايبنا..

“ع السكين يا بطيخ”.