ما تحاولش الشاعر ….عاطف عبد الحميد ……

ما تحاولش الشاعر ….عاطف عبد الحميد
…….

الشاعر والإعلامي ….عاطف عبد الحميد

ما تحاولش
تبقى وسط الخلق وش
يرسموك على اى جثه
يغسلوك بالخوف تكش
يفردوا حزنك بمكواه
يحسدوك على عيش ومش
…….
ما تحاولش
تبقى فارس ف البيادق
او ما بين اموات بطل
حلمك المزعوم تلاحق
بين كراميش الخجل
وانتصارك وهم عايش
واحتضارك سهم طايش
وانكسارك ريش وعش
……
ما تحاولش.
تبقى صادق في المشاعر
وانت قلبك من كاوتش
الاذين مطاط وواعر
والبطين م الشوق يكش
و الروافد
..الف وافد م الوريد
واللى صادر
من شرايينك يقيد
والنتيجه
ف العروق اوهام و غش
…..
ما تحاولش.
تبقى فوق السطح دش
يظبطوه على اى موجه
و إن قطع إرسال تووش
او تعيد اخبار قديمه
لو تروح منه الإشاره
او تعيش فى فيلم سيما
من قمر كسلان تغش
…..
ما تآمنش
للى عمره بيك ما آمن
واللى قلبه مش مآمن
وانت خطوه و نص لكن
عمرك المنحوس يفرفط
موت فوجاؤه مالهوش كش
ما تحاولش
…..
الشاعر والإعلامي ….عاطف عبد الحميد
….