شق ريقه
وابتدا يعصر لسانه م اللي باقي من كلام
الحروف بترن ع الأسفلت توهه
لسه باقي له إبتسامه …
بره دايرة لإحترام
مش ضروري تكون بطعم البيره … ساقعه
أو بطعم البرتقان …
البراندي طعمة أحلى ….
و عااااادي جدا …
السما بنوته فايره
والمطر برفان ….
رساله للعريس ….
ليه زرع في كيانه اخدود إنعراجي
وارتضى مشواره يبقى عكس سير الإتجاه
السيول إنتابها حاله من التوتر
جوزوها لجل تهدى أمور كتير
الكلام الفاضي قام قالع هدومه بشكل همجي
والحكايه إتلوت …
تشبه لكوبرى
وابتدت ترقص بعنف …
رقصه سيكو
إستفذت فيا أشياء شبه ماتت
لما بؤرة الضوء الوحيدة جت عليها …
بانت الصورة …………… ( سلويت )
وعتمت كل الإضاءات المثيرة … !،،
البداية موسيقى (موتسارت)
خش ( بتهوفن ) عزف (لسالومي) نامت …
و الخيانه ف دمها
إنما ( رنوار) قطع مشوار براءته ( برقصه ) بكر
ليها مليون ألف معنى
والمعاني كتيره لكن …
كلها جوانا تايهه
بس وحيات من جمعنا
بدون ميعاد
فيه سؤال ….. محتارة فيه !
حد فاهم مني حاجه؟؟؟
مفتكرش ….
سهلوها …. إيييه ؟
لما مصوا دم دبور مره زن
واتحفظ جوة الفريزر (ربع )قرن
النهارده فرقوه نخب الخيانه..
٣………هههههههه صحة
الخلاصة …..
لو يشقوا قرص الشمس حتى ويدخلوها
يسألوها …..
بكره فين ؟؟؟
بكره جي …. مسيره جي
جي في ثوبه الجديد
لجل يرمي اللوم علينا
جي يقول … هو إنتوا مين ؟؟؟
أمسكم مالهش ذكرى
والنهارده أمس بكره
ليه قلوبكوا لبعض تكره
كنتوا فين ؟؟؟؟
حبكم أصبح وسيله
واندفن فيكوا الفضيله ….
والتزامكوا والتسامح
والحوار ليه بينكوا جارح
والرحم قطع بكارته
دمكم زادت عكارته
لما تاه الحق فيكم ….
كنتوا فين ؟؟؟ كنتوا فين ؟
ياله نصرخ…
(لما صاب السهم قلبي … قمت مت !!
بس مت ألف مره … لما شفت مين رماه )
كلمات الشاعرة السلطانه / آمال بسيونى
Discussion about this post