سامحيني خلاص هاخلف عهدك
مش قادرة اكمل وياهم
انا كل ما اسامح باتعذب
وبراعي وباخلص القاهم
بيدوسوا عليه وبزيادة
وغباءهم شيء أصبح عادة
وبيرموا همومهم فوق همي
وباصبر نفسي واقول عادي
ما هو دول من لحمي ومن دمي
وف وقت الشدة باكون مأوى
وتملي عشانهم باستقوى
وافرد احضاني عشان خاطرك
وباضحي بعمري وأفديهم
ويوماتي انا بادعي ومن قلبي
(ياخد من عمري ويديهم)
وباشوف الشر في خطاويهم
ايه اخر الغل اللي ماليهم ؟
وانا قلبي عشان دايما طيب
بيدوسوا عليه ألفين مرة
جواهم غش مايتعدش
والضحكة يادوبك من برة
وعملت كتير لاجل عيونهم
وحلفت اعيش لاجل ما اصونهم
في الشدة وفي الفرح معاهم
دي جزاتي ان انا كنت باعينهم ؟
وقلوب على طول دايما تعند
وعيونهم ليل ونهار تحسد
وانا مهما عملت مافيش فايدة
بيعضوا الايد اللي بتسند
دي بجد ياناس حاجه تحير
طب ليه على بعض بنتغير
الدنيا دي رحلة وهتعدي
والعمر أكيد عمره قصير
الحب خلاص سلعة رخيصة
ع الكره الناس صبحوا حريصة
الطيب يعني عشان طيب
في عيونهم شايفينه فريسة
الدنيا خلاص صبحت غابة
عايشين على بعض بنتغابى
والود خلاص يرحم زمنه
والناس ميت وش وكدابة
سامحيني يا غالية ابوس يدك
باتمنى اكون حالا عندك
ولأني تعبت ومش قادرة
مضطرة حبيبتي اخلف عهدك .
كلمات الشاعرة
منى جلال
Mona Galal