كلمات الشاعر
محمود محمد فليفل
عايش لوحدى و مدَّارى
والكل بيا مهوش دارى
أفضل آهاتى وأنادى
ولا حد رد ودا العادى
أشكى لحالى من حالى
ونفسى ما ترد سؤالى
أنده على النوم ما يردش
وعقلى ساكت ما يصدش
وحيره رايحه شمال ويمين
والقلب يحلف بقينا مساكين
ماسكين جراحنا بإدينا
ولا حد يوم بص علينا
بقينا ف الوحده حكايه
نحكيها ونقول دى روايه
والشعر ينطق بإديا
والكلمه بتعز عليا
تدبح ف قلبى يقول صابر
ولا إيد تطبطب ولا جابر
وألقى نفسى وَحْدِيَّا
ودموعى تنزل بأسيه
تقولى بس قول مالك
قولِّى إيه غَيَّر حالك
أرد وأكتب أى كلام
وأقول ياحلمى إمتى هنام
وعجبى …
كلمات الشاعر
محمود محمد فليفل
Mahmoud Mohamed Flifel
