سنه مستعمله
بيقولوا فيه سنه جايه علينا
دي سنه جديدة تحلي ماضينا
أنا نفسي ف سنه فاتت بينا
سنه كدا مستعملة ف الماضي
ألقى معاها أنا كل أحبابي
ألقى أنا أمي وأتوه ف عيونها
وأغرق جوا حنانها أسكنها
هي أساساً كل أصحابي
وادفى وأخبي أنا قلبي ف إيدها
وأسمع صوتها واحشني كلامها
سنه واخده من الماضي حنانه
ومن الحاضر كل جنانه
سنه مافيهاش غدر ولا أسية
ولاحتى حروب ولامرازية
مش لسه هحايل في جنابها
أصلها لسه جديدة ياعيني
م الأيام ماشافتشي كتير
أو كدا طالعه من التخدير
عايزه انا سنه صبرت واتأنت
سنه ماتميلشي مع التأويل
سنه كدا عشرة نفسها طويل
متكونش منفسنه أوكشره
وان يوم مال أنا زمني تميل
سنه كدا فيها الحب وفير
سنه كدا برضه نطير وياها
سنه لسلامة وطني سفير
وكمان يكتر فيها الخير
ومعاها تشفى كل جروحي
والفرحه اعلقها ف روحي
لجل تكون للدنيا شموع
ميكونش في إنسان موجوع
وياها نعدل خط السير
لجل تكون القدس براح
وخلاص تحلى معدش جراح
والزيتون يطلع من تاني
ونجومها ف سماها ملاح
تزرع خير من صبر ولادها
ويفوح وردها عطره سماح
تتطرح حق يقول للدنيا
حق الشهدا عمره ماراح
هي السنه دي اللي أنا عايزاها
سنه كدا شرحه بخير طراح
وإن تسألني أقول يا عزيزي
كلها أيام بنعدها لكن….
هيا كمان بتعد علينا
كلمات
الشاعرة شيرين عبد السلام
