صباح الخير
صلاة الفجر قوم صلي ..
أكيد تقدر
وطوٍل ف السجود عَ لي
كمان كبُر
واعرف ان احوالك
سبب مكتوب ومتقدر
وسيب الدمع يغسل جوه نني العين
ويستغفر
……….
صباح الخير
تعالي قولها من قلبك
بدون تكشير
ولا تفَتٌح عيونك بالدموع تاني
وسيب الرب في التدبير
وليه نيأس ؟؟
وليه طولنا ف التوهه
وف التفكير
وليه ايد الأسي طالت جوارحنا
وعَدِت فوق حدود الغير
وليه لخبطنا نفسينا
وغيّرنا ف خط السير
مادام الحب جوانا وعايش
بالوداد والخير
مادام لسة الوصال غالي
وعايشينه بشوق و ضمير
ولسة اللقمة فيها الملح والعِشرة
ولسة الحبل مادينه
لجوا البير
فخلي النور
يطول جوا النفوس تاني
وخلينا نغرد ويا فوج عصافير
وفك الطوق
وارمي الحزن من قلبك
مادام رب الوجود صاحي
وهو عليم باحوالنا
وهو صاحب التدابير
ف خلي الحب مكتوبك
وارسم ضحكة ع الشفة
وردد وانت متبسم….
صباح الطيبة والعِفة
صباح الخير !!
صباحكم خير وبركة
وتيسير يا طيبين
كلمات الشاعرة
ميمي محمود عبدالجليل
