وقت الوداع
مقدرتش إني أحضنك
وقت الوداع
وقت أما كان قلبك بيتهجي المصير
وعنيكي لايجه ف المكان
والخوف علي طرف الرموش
عصفور كسير
فارد جناحه ف الفضا
يتمني لحظة فضفضه
أو هزه من روح الوئام
تطرح ف أغصان الضمير
طيب سلام محتاج أطير
يامه عشت عمري ف دنيك
أعمي وأسير
يامه كنت بابدر بسمتك
تطرح أمان
عايش ف ضل محبتك
ولا عمري خفت من الزمان
وهاخاف وليه
إيه تاني بس أخاف عليه
وانتي الهدف لما بتوه
أم الرضيع لو هددوه
لو خيروه يختار ومين
بين حضنك انتي وبين أبوه
إنتي الأمان إنتي السكن
إنتي الحنان
علمتي قلبي ازاي يصون
يحفظ عهودك ف الغرام
ولا عمره يقدر يوم بخون
لحظات سكون بتهز ضعفي تشدني
وتردني لعمري اللي فات
محتاج إيديكي تلمني
تنبش ف روح الذكريات
إزاي تقولي لحظات وكات
وتقولي كانت غلطتي
كدبه وكنت ف دنيتي
والعمر فات
كلمات الشاعر
نسيم الزراع
