عريس يابووووووى ,,,,,, بقلم /نورا عواجه

عريس يابووووووى ,,,,,, بقلم /نورا عواجه

بقلم /نورا عواجه

كل أب وأم بييجى عليهم وقت بيتحطوا فى موقف أن ييجى عرسان يطلبوا إيد بناتهم أو أن أبنهم يتقدم لطلب إيد بنت معينه ،
لما الأمر ده بيحصل ..طبعا بناخد فرصه نفكر ونسأل عن العريس وأهله , أصلهم وفصلهم وشخصية الولد وتعاملاته مع أهله وأصحابه وجيرانه والعكس صحيح ، ولو تمت الموافقه ، بيفضل جوانا خوف كبير إن بعد الجواز كل ده يتغير وينقلب النقيض والأمر ده مع كل الناس ،
أمى الله يرحمها كان ليها مجموعة أمثال كده فى كل موقف..منها المثل المشهور تعرف فلان قال أعرفه
قاله عاشرته ، قاله لا ، رد قال يبقي متعرفوش ، والكلام ده حقيقي مليون فى الميه . لإن العشره والمواقف هى أصدق حاجه ممكن تبين الإنسان على حقيقته .
يعنى بعد الفاس ماتقع فى الرأس زى ما بيقولوا ، طيب وقتها أعمل إيه ؟! لو طبعه طلع وحش . بخيل . عصبي . نكدى . بيضرب . مش متفاهم . قاسي . مش قد مسوؤليه الجواز والبيت والأسره ..
لقيت نفسي فى دوامه ملهاش أول من أخر ،
وكل ال جوايا دعاء واحد وطلب واحد مفيش غيره
إن عريس بنتى يتقي ربنا فيها ، ويعاملها بما يرضي الله .
لماسألوا الإمام الحسن البصري لمن تزوج أبنتك
قال لمن يتقي الله إذا أحبها أكرمها وإذا كرهها لم يُهنها ،
فحبيت من خلال مقالى ده
أوجه رساله لكل شاب مُقدم على الزواج ،
قبل ماياخد الخطوه الخطيره دى ،
عوزاه يسأل نفسه سؤال واحد ياترى أنا قد الأمانه والمسؤوليه الكبيره دى ولا لا ؟!
ياترى هقدر أحافظ على بنت الناس دى وأعاملها بما يرضي الله ورسوله ؟!
ياترى أنا فيا المواصفات ال بتمناها فى عريس أختى أو بنتى فى المستقبل .
ياترى أنا هكتفي بيها زوجه وصديقه وحبيبه وشريكة عمر .ولا هخليها أم العيال
وألف وأدور بره بيتى براحتى
وأخلى عينها وسط رأسها والقلق والشك يموتوها فى كل دقيقه وهى بتسأل نفسها أنا فين ومع مين ويخليها تندم انها فكرت تتجوز فى يوم من الايام ؟!
ياترى أنا راجل قد المسوؤليه بجد ، وهبقي قدها مهما تمر بيا الظروف ومهما الدنيا تخبط فيا..؟
ياترى هحافظ على سر بيتى ومراتى وأعرف أفصل حياتى عن حياة أهلى من غير ماأظلم حد فيهم وأفضل بار بأمى وأبوى وأخواتى ،
لأنه مع الأسف شباب كتير مش مدرك مدى خطورة الخطوه دى ولا مدى عواقبها لو هو مش قدها ،

ورساله لكل أب ، أو أم ، أو ولى أمر ريحين يخطبوا لأبنهم أو حد من عيلتهم
هتتسألوا قدام ربنا
لو أنتوا عارفين أن أبنكم مش قد المسؤوليه أو عارفين أن فيه عيب أنتوا مترضهوش لبنتكم ، وماشيين معاه عادى
وكأن العروسه دى مش بنت ناس . والعكس صحيح برضوا لو البنت مش قد مسوؤلية الجواز وأهلها داروا وكان كل همهم يجوزوها وخلاص ،
أعرف ناس محترمه جدا ومهما كان صلة القرابه ال بينه وبين العريس أو العروسه يقول شهادته بما يُرضي الله لأنه حاسس بالأمانة والمسؤوليه ،
زى مافى ناس برضوا بتسكت وملهاش دعوه ، لحد ماتيجى تقولهم محصلش نصيب .
يرد يقولك أحسن أصل العريس فيه كذا وكذا ، أو العروسه فيها كذا وكذا
طيب كنت فين لماسألتك وأخدت رأيك . يقولك ياعم وأنا مالى إمشي فى جنازه ولاتمشى فى جوازه .
الرأي كله أمانه وخصوصا فى الجواز ، أينعم النصيب غلاب
بس على الأقل تعمل ال عليك قدام ربنا ،

بمناسبة الواحد لما يسألوه عن حد ويكون فيه عيب ويخبيه

فَاطِمةَ بنْتِ قَيْسٍ رَضِيَ اللَّه عَنْها قَالَتْ: أَتيْتُ النبيَّ ﷺ، فقُلْتُ: إنَّ أَبَا الجَهْمِ ومُعاوِيةَ خَطباني؟ فَقَالَ رسُولُ اللَّهِ ﷺ: أمَّا مُعَاوِيةُ، فَصُعْلُوكٌ لاَ مالَ لَهُ، وأمَّا أَبُو الجَهْمِ فَلاَ يضَعُ العَصا عنْ عاتِقِهِ ،

والحالة دي من ضمن ست حالات مسموح لنا أننا نقول العيوب بكل وضوح من غير ما نأثم أو تُكتب غيبة ،

وفى النهايه ..
لكل الشباب والبنات والأباء والأمهات أتقوا الله فى القلوب والمشاعر والبيوت ،
ال مش قد كلمه مايقولهاش
وال مش قد المسؤوليه مايتقدمش لبنات الناس ،
والأهم ال عنده شهادة حق يقولها ومايخفش ..
وتذكروا قول الله
ومن يتق الله يجعل له مخرجا و يرزقه من حيث لا يحتسب ..والسلام