كلمات الشاعر
سعد الشرقاوى
مونولوج الفيسبوك …
انا متخاصم ويّا النت وكلـّه يا سادة من الفيس بوك
والليّ عمليّ صديق متخفيّ ورحمة أميّ لخابطه بلوك
الطلبات بتهل عليّا
والاسماء طبعا وهميّه
واللى بيعمل نفسُه وليّه
ويدخل ع الدردشة ويعُك
وانا متخاصم ويّا النت وكلـّه يا سادة من الفيس بوك
والليّ عمليّ صديق متخفيّ ورحمة أميّ لخابطه بلوك
,,,
واحد كل دقيقة بينشر هلس وخبص ولبْص كتير
تلقى طبيعطـُه ما يسواش حاجه وعامل باشا وابن وزير
مرّه بيشعر بالاحباط
مرّه مسافر على دمياط
مرّه بيشكـّر فى عطيّات
من أسلوبه لابد تشـُك
وانا متخاصم ويّا النت وكلـّه يا سادة من الفيس بوك
والليّ عمليّ صديق متخفيّ ورحمة أميّ لخابطه بلوك
,,,
والليّ كاتبلي رسالة طويلة يقول ابعتها لكل الناس
عاملك بعزق عايزك تعزق وتفرّقها بإيد الفاس
والليّ عامل لي فيها سياسي
بيصدّعني ويوجع راسي
بيفكـّرني ويطلع ناسي
وقاعد طول الليل بيْلـُك
وانا متخاصم ويّا النت وكلـّه يا سادة من الفيس بوك
والليّ عمليّ صديق متخفيّ ورحمة أميّ لخابطه بلوك
,,,
والليّ مسجّل إنه مؤهّل أو بيحضـّر فى ماجيستير
وهوّ عواطلي وابن قهاوى وعنده بلاوي ولصْ كبير
تصبح واحد م الاصحاب
لمّا يجاملك بالإعجاب
والتليفون ح يجر خراب
يعمل فصل كبير ويفـٌك
وانا متخاصم ويّا النت وكلـّه يا سادة من الفيس بوك
والليّ عمليّ صديق متخفيّ ورحمة أميّ لخابطه بلوك
كلمات الشاعر
سعد الشرقاوى
