كلمات الشاعر
محمد جابر المتولى
ملامح من ذاكرة الجنون
كل ما اكتب
الحروف بتترعـش
والسطور دايبة ما تقدر
تحمل المعـنى اللي ضايـع
في الشعـور المنتهى
المسافة بتنتهى
والدخان رسم القصيدة في الهوا
صور الأمانى بتتحرق
دقة الساعات جبل
ويا هزهزة المشاعر
جوه مرجحة الجنون
سيمفونية عشوائية
للألم والاحتمال
لما ابص في المرايا
ألقى حد تانى ماسك
شاي بلون الليل تقيل
يسكبه في جوفه اللي شاحح
من طعام الفرحة وألقى
فوق كتافه
شايل الأرض الحزينة
أم جغرافيا الضياع
أم توهان الوليد
جوه رحم الاحتمال
*********
اختلال كل الصور
فوق حيطان متشققة
انهيار أبراج قديمة
للأمل والانتظار
بسكويت محشى بلبن
شكل عضلات البطل
لما أقوله كش يجرى
يستخبى في الضياع
أمنا يا أم الألم
مجرى صدرك جاف مشقق
نبته هش في ريح عدم
الكلام واقف معكز
فوق عصايا كلها نمل الانتظار
النهار جوه المرايا
شيخ عجوز بردان وخايف
الانهيار
يا صغار ………….
ياولاد دموع الانتهاء
لملموا كل الجماجم
قيدوا فيها نار أملكم
من بدية يوم ما نالت
مدرستكم حقها مـ الاغتصاب
********
السخونة طالعة تجرى
مـ المرايا في الدماغ
حمة فايرة
ترتعش منها الكبابى
أم تفل داق مرارة
كل أفكاري المراهقة
عنى وأنا لابس بيجامة
أحتفائى بالبطل
القلم خايف بيجرى
مـ السطور
والحروف عريانة جدا
واقفة مش مكسوفة منى
عايزة تسكر مـ الدموع
أمي ياله زغردي
الجنون جلابيتي
والبلادة محطتي
والسخونة أتلفت
كل أبراج النضارة والتعـقل والجسارة
والبطولة والبشارة
والتعـفن جوه علبة تونة جافة
هوه ده مقصد مراتك يا أبويا
بعد أمي
انتباه
الحروف بتترعش
والمسافة انتهت
المسافة انتهت
كلمات الشاعر
محمد جابر المتولى
من ديوان أخر عنقود الألم
اللوحة لأستاذ السريالية الفنان الكبير سلفادور دالي
