بقلم الشاعر … عامر عبده عامر
عطيتك حناني …
عطيتك حناني
و بإيدي سقيتك هنا
بقالك يومين ما سألتش عننا
قضيتهم لوحدك غنا و دندنه
دلعتك كتير
وإنت الخسران
مش أنا
وحياه الشوق اللي كان
طالع مننا
وحياه كل دقه
كانت زياده عن دقه قلبنا
هتدفع الثمن
وقلبك هيندم
وتيجي لحدنا
واليوم اللي عدى
في بعادك عننا
هيقف عليك
كأنه 100 سنه
مبروك عليٰ
يا أبو قلب ظالم
وعيون قويه
كان فاضل شويه
وعيوني تاخدهم هديه
أنا كنت في حياتك
كل عزوتك
في يومين وعدوا
تبان قسوتك
الباب اللي بينا
خلاص هقفله
وما حدش هيجي
على قلبي يغفله
يا خساره المحبه
اللي راحت هدر
وقلبى الحنين
بيه أتلعب و أتغدر
أنا مش هسامحك
وهسيبك للقدر
عشان اللي حصل
منك وبدر
و هقطع اللي بينا
لو كان حبل الوريد
وعمري ما أفكر
أحب من جديد
و هقطع رسايلك
و أعملهم دواير
و أبعد عني حبه
عشان دمي فاير
كنت ظاهر لى المحبه
وكان إيه خلف الستاير
بقلم الشاعر … عامر عبده عامر مصر
Discussion about this post