كلمات الشاعر … عواد مهنى
بقيت ماشى ب أقول لله
وب أستعطف يجود الشعر
لو بحروف
أنا صحيح ما أنيش معروف
وشعرى كله وش كسوف
لكن خارج عن المألوف
ب أقول الصورة بتنور
وتتدور
وحطة الكحلة ف رموشها
وتبقى ماشية تتغندر
تقولش عروسة فى البندر
وعارف بردو هوياتى
وبتدوب فيا وإحنا صغار
حروف الشعر عشقانى
وكان بينى وبينها سيجال
بشوفها زينة البستان
وأجيب ليها ١٠٠ فستان
وعاشقة كتابتى فى سياسة
ولو ب أكتب فى أغنية
تقوم تعمل لى رقاصة
حروف دايما ملازمانى
وتهدينى بأحلى كلام
قصيدة بيور
لا تعرف غيرة
ولا حطة رموش عيرة
ولا بتعرف الشبان
قصيدة بكر بنت حلال
تيجينى لو ف عز النوم
تزق الباب وتفتح شيش
تكلمنى كده بشويش
تملينى قصايد شعر
ولما البيت مايعجبنيش
تقول لى بلاش
ح أجيب لك قصر
وأعلق له نجوم وفانوس
ما هو أصل قصور الشعر
مش بفلوس
كلمات
الشاعر عواد مهنى
Discussion about this post