الدنيا أصل وصورة مختلفين
عايشين فى صورة وصورة بتعيشنا
حلم الصبا غًيم ومش شايفين
ودخلنا شق الزمن ميل وخربشنا
. الدنيا أصل الكدب والتهبيش
اوصفها زى ما هيا ما تخبيش
الكدابين ساندين على وشوشهم
هما اللى قالو الكدب ما ينجيش
. العدل لو معدول تشقلبنا
وتسيبنا نستسلملها تصيبنا
والحق لو مظبوط على الموازين
تاخد نصيبنا بحاله وتٍدٍينا
.. الصوره تكسب واحنا بتضلنا
نرضى بقليلنا واللى يفضلنا
( الغش طرطش رش عا الوش بويا)
وانا زى أبويا الزمان عَلًنا
.. أنا لسه قادر عاالكلام وسكت
ورضيت بصمتي بعد ما اتأكدت
ان البشر ميت ألف كدب ولون
وان الحقيقة إننا….
حبة ورق وماكيت
.. الصمت أبلغ رد عا الخاينين
والمهزومين فى النور ومش حاسين
والبياعين الوهم للحاشية
ماشية الحياة عكس البنى أدمين
كلمات الشاعر
عمرو عامر
Discussion about this post