جايز فؤاد

جايز فؤاد …
لو قلتِ بس قريتي ايه
جوا عيوني الغلبانين
خلاكِ تمشي تدوري
يمكن في مرة تحسسي
على قلبي اللي بيندهك
من كام أمل !
وقت أما شافك في المدى
طلعة نهار
بتزحزحي الليل الردي
عن ضي شموسة النشيد
طب قولي حلم بتحلميه
شوفتيه بيرسم نظرتك
للجرح والقمح اليتيم
صبر وبراح !!
على خوف يطول حتى الحنين
لايدين تملّس يستطيب
وبراح لُقا بيكِ في مقام
بتقدسيه جوا القصيد
جايز فؤاد ..
ما قدرشي يكدب ع السما
باكمنه متشوّق يشوف
الكحل في عيونك مدد
درويش في حضرة وِرد روح
تتوسدك .. زي اللي بيمنّي الحمام
في الغيّة بعد ما طار بعيد
وعليه يعود
حتى ان تضاريس الرجوع
اتصّعبت بالقسوة والمنفىٰ
النوى
طب شوفتِ ايه ؟
حسيتي ولا حنفضلوا
أنا والقمر ..
والشعر والنيل نسألوا ؟

كلمات الشاعر
حمدان حلمي