———————-
مش غريبه القلب يطلع
بعد جرح لجرح أجدد
كل لون جواكوا إسود
والفواتح غايبه عنكم
أي لون أبيض ف إيدكم
ينقلب ف الحال رمادي
كل جرح معاكو عادي
مانتوا منبع للجراح
وانتوا دابحين الصباح
بين عيون الطيبه غيمه
كل أفعالكوا اللئيمه..
فخ يصطاد الضحايا
وانفعالات البراءه
ع الوشوش نص الحكايه
بس من خلف المرايه
ألف حاجه بتبقي واضحه
رغم كانت متداريه
ألف حيله لولبيه
بيها بتخطوا الموانع
كل يوم إبليس ضميركم
يستخبي خلف جامع
كل سر ها يبقي شايع
مهما غيبتوا تداروا فيه
كام سؤال فاتح إيديه
للإجابه التايهه بينكم
كل نور ضاع بين ضلامكم
لما شاف كل الشوارع
قاعده ف الحاله التعيسه
قلبي فاهم رغم طيبته
كل أفعالكوا الخبيثه
والعيون المستغيثه
لسه فيها الشوف بصيص
رغم مفتوح الهاويس
للدموع ع الخد تجري
عدي وقت ولسه بدرى
ع النهايه واللا حانت؟
لما اشوف الشمس بانت
يومها ح افرح ف انهزامكم
وانكساركم
واندحاركم
يومها فعلا غصب عنكم
جرح قلبي…
رح يطيب.
كلمات الشاعرة
قوت القلوب
Kout Elkloub
Discussion about this post