ساعاتْ -1
ساعات تضيڨ خلوڨي
ما يبان عندي غْروبْ مِنْ شْروڨَي
يتْخبّلو لَبْساط وسْطْ رْمُوڨي
وحتى الشْهد يمْرارْ وسْطْ حْلوڨي …
وْ ساعاتْ يزْهى الخَاطِرْ
كَاس اللّبَنْ يصبحْ عَسلْ يتڨَاطر
و نْهِزّها بالصّوتْ “يا بيرْ ماطرْ”
و نْجيبْها صَليحة على بخْنوڨي …
ساعاتْ يسْرَحْ بالي
نرْجَعْ نخَمِّمْ في سْنييينْ لْتالي
وْ نِتْفكِّرْ أياّماتْ باهي أحْوالي
تْنَاهيدْ نَقْطَعْها تْسِدّْ عْروڨي
وْ ساعاتْ وِسْطْ الضِّيقه
و القلْبْ شاعِلْ نارْ كِنّي حْريڨَه
تْلاقِيني زِنْسْ حكايَه في دُرِّيقْه
ما نفيقْ كان بضَحْكتِي رقْروڨي
ساعاتْ مُخّي يِكْبِرْ
لا تْدْرْدْعو خْصوماتْ لا يتْحيِّرْ
رازِنْ بْحَرْ الِّرِّينْ ما يدّرْدِرْ
ما بْهاه كي يْنوِّرْ ظلامْ طْريڨي
وْ ساعاتْ عَقْلي يْخِفْ
مثْلْ الصّغيرْ عِيني بْكِلْمه ترِفْ
وَاناَ سْخِيّْ صْعيبْ دمْعي يْجِفْ
و تتْكدِّرْ أحوالي مْريضْ حْقيقي
وساعاتْ و ساعات و ساعات …
السّاعاتْ يا لَحْبابْ ردّه بْرَدّه
تْواتيكْ مدّه و تعْكْسِكْ في مُدّه
ميزانْ وِسْعْ البَالْ ليهَا عُدّه
و ما يْدوم حال بْحالْتُو يا رْفيڨي
ما يدوم حال بحالتُو يا رفيڨي
زهرة .
من •وشمات•
Discussion about this post