عبالي

عبالي إرجع صبيّة
والعين اتدل عليِّ

واتدلل علكل
هيدا تعا وهيدا فل

وقول شو بدي
وشو ما بدي

وكإن بالكون
ما حدا أدّي

عبالي إقعد عالبلكون
ويمرق اقبالي مين ما يكون

شب مهستر أو مجنون
وتكون مفتحة عليِّ لعيون

وتقلّي إمي فوتي من البرد
شو بعدك عمتعملي هون

عبالي عالمدرسة ما روح
وبالسر اتلاقى
مع حبيب الروح

يهديني وردة
ريحتها بتفوح

وحطها بعروة زر
مريول مفتوح

عبالي خبّر رفيقتي حكايات
ألّفها وعيشها ساعات

بحجّة إنها أسرار
لو عرف القمر حيغار

ويقعدلي عباب الدار
وقلو كبرنا وبطّلنا صغار

عبالي بالعمر إرجع
لوردة بمزهرية

من الندى مسقيّة
خجلانة ومستحية

ويقدمني هدية
واسمو عالكرت
ويشبكو فيِّ

عبالي غمّض عينيِّ
واتذكر قصص منسيّة

بركي روحي بترد ليِّ
وبتبتسم اللمعة بعينيّ

عبالي!
لو كنت هيديك البنت
العفوية الشقيّة

الما بهمها قانون
ولا بتتقيّد بشرعية

عبالي!

فاطمة البلطجي
لبنان/صيدا