شاعر… بيّاع السّبح

بياع سبح وكمان شاعر
شهبندر يشحت في الدعوات
اراجوز وبهلوان ساحر
عطشان وأبوهْ السقا مات
………
الكف مشقق شقيان
والقلب عفي ابيض بفته
عز الدفى تلاقيه سقعان
مانيكان متعلق ع اليافطه .
………..
عاشق الرّصيف واللّيل
وكلاب سكك وقطط وفران
ولولا شفاعه المناديل
كان الزّمان وكأنّه ما كان …
……………
شوبش ياحبايب شوبش يابنات
قطر الجواز اهو جي هناك
هاتو الحلل بلو الشربات
الفجر طالل م الشباك…
……………
يابلاد بتموت ولا تحياشي
على قد ما بحبك ماشي
وشربت من كاسك وفارقت ونّاسي
وعاشرت فيكي الكل
شوفتك بإحساسي……
…………..
ماشي كده في عماد الدّين
تمثال أو أصبع كان غضبان
قالي امتى ياولاد ستين
حتحرروني من الطّغيان….
……..
ياستّنا الرئيسه
يا أم العواجز والعواجيز
فاتت سنه كبيسه
وشجره لمون طرحت جميز.
…………
ياصحابي في كل حتّه
ياصحابي في كل مطرح
فاضل على الحلو تكه
وبكره الكل يفرح…..
……………
هانت خلاص ياحلوه
يابلدنا يا أحلى غنوه
والله ماياخدش غلوه
ولا حتّى ست ساعات .
……
بيّاع سبح وكمان شاعر
شهبندر يشحت في الدّعوات
اراجوز وبهلوان ساحر
عطشان وأبوهْ السقّا  مات

كلمات الشاعر
مصطفي البحر